उहा रोटी, उहा दाल

गरीब अते अमीर

तुसा ऐ कहावत तां सुणी होसे कि ‘गरीब दी कुआर, सांझी भाभी’ अते ऐ गाहल सोलह आने सच्ची वी हे। भावें अज दी तारीख तक गरीबी दा कुई पैमाना तय कैनी थ्या अते न ही किडही थी वी सगसे। वल वी दुनिया विच गरीबे दी कुई गणत्री कैनी। आओ आपा सोचू कि गरीबी क्या हे अते गरीब कौन हे?
मोटे तौर ते आपां गरीब हूंकू अखेदू जैदे कोल खावण दे लाले पे होविन। वल ऐ खावण तो असाडा क्या मतलब हे? क्या ओ शक्स गरीब हे जैंदे कोल रोटी कैनी? क्या ओ शक्स गरीब हे जैदा पेट नीह भरीदा अते हमेशा ही खाली राहदे? क्या ओ शक्स गरीब हे जैंदे कोल तन ढकण वास्ते कपड़े कैनी? क्या ओ शक्स गरीब हे जैदे कोल पैसा कैनी? इवे ही हजारां स्वाल हिन जैंदा जवाब आपा जाणदे होएं वी कैनी जाणदे।
कितनी अजीब गाहल हे कि असाडे विचो निनाणवे फीसदी लोग खुद कूं गरीब अखेदिन। चूहड़दास तो ला के मायावती तक सब गरीबे हिन। ऐ सारा दा सारा समाज गरीब नाल भरया पे। खुद हिंदुस्तान तो बाहर निकल के आपा झाती मारूं तो तकरीबन हर मुल्क गरीबी दे विच फाता पे। अज दी तारीख विच सब तों ज्यादा अमीर गणीजन वाला मुल्क अमेरिका वी गरीबी नाल लडदा थे। फ्रांस होवे भावे इंगलैंड, जर्मनी होवे या जापान, सारये दा हिक्को हाल हे। पैसे पिछे आपा इतने गाहले थी गिऊं कि अपणे अते ओपरे दा फर्क नजर नींह अमदा।
वजह क्या हे कि आपा गरीब हेसे? हूंदी वजह ऐ हे कि असाडी जिंदगी द्या जरूरतां ही इतनिया वध गिन कि उन्हां कूं हासिल करण विच आपा खुद कूं ही भुल ग्येसे। सोचण दी गाहल हे कि पैसा वहु जरूरी हे, पर सब कुझ पैसा ही तां कैनी। वल वी पैसे मिछो वंदा, डीह रात प्या मरदे।
असाडी तमन्ना ही असाडे डीह रात दे चैन कूं बेचैन कीती वेंदी हे। तमन्ना जरूरी वी हे। समाज विच राहवणे तां समाज दे कदरे-कानूने कूं तां मनणा ही पौसे। इन्हां कदरें वास्ते कुझ कीमतां तां चुकावणा ही पौसिन। कीमतां अदा करण वास्ते कुझ कम वी तां करणा ही पौसे। ऐ हिक इहो जेया चक्कर जैंदे पिछो इंसान खुद घनचक्कर वणया वदे।
ऐझी गरीबी तों छुटकारा पाता वञे तां कीवे? ए हिक अहम स्वाल हे। अते ही स्वाल दा जवाब शायद ही दुनिया दा कुई मुल्क डे सगे सिवाय भारत दे।
भारत कहीं वेले जगतगुरु मन्या वेंदा हा अते अज वी भारत दी उहा ऐहमीयत है। गरीबी तों छुटकारा पावण दा मंत्र अगर कही दे कोल हे तां ओ भारत हे। आओ आपा अपणी सकाफत कू पहचाणू। असाडी सकाफत दी बुनियाद असाडे आध्यात्मवाद नाल जुड़ी हुई हे। अज तो तकरीबन ढई हजार साल पहले महात्मा बुद्ध दे डित्ते सबक कूं याद करूं जिन्हां जिंदगी दा निचोड़ कढके असाडे सामणे रख्या हा। उन्हां फरमाया कि संसार डुखे दा घर हे। अते असाडे डुखें दा कारण असाडियां वासनावां (इच्छावा) हिन। इन्हां इच्छावे दा अंत करके ही आपा अमीर वण सगदूं। यानी कही चीज दी तमन्ना ही न करो।
जो कुझ वी तुआडे मुकद्दर विच हे ओ तुआकूं मिल के ही राहसे। श्री मद्भागवद् गीता दे मुताबिक कर्मणे वाधीकार अस्ते’ यानी कर्म करणा आपा न छोड़ू जेझे असाडे कर्म होसिन, हूदा ओझा फल तां मिलके ही राहसे। वल चाहे आपां खुदकूं अमीर आंखू पा गरीब, ऐ असाडी अपणी मर्जी हे।